सोयगाव दि. २५ (वृत्तसेवा) शहरासह तालुक्यात ठिकठिकाणी मोठ्या उत्साहात धुलिवंदन साजरा करण्यात आला. शहरात सकाळपासूनच चिमुकल्यांसह, तरुण व जेष्ठांनी रंगीबेरंगी रंगाची उधळण करीत धुलीवंदनास सुरवात करण्यात आली होती.
सोमवारी धुलीवंदनाच्या दिवशी सकाळ पासूनच शहरात रंगोत्सव साजरा करण्यास सुरुवात झाली होती. चिमुकल्यांसह, तरुण व जेष्ठांनी सकाळपासून एकमेकांना रंगीबेरंगी रंग लावीत धुलीवंदनाच्या शुभेच्छा दिल्या. दरम्यान तरुणांसह चिमुकल्यानी डीजेच्या तालावर थिरकत एकमेकांना रंगीबेरंगी रंगाने रंगवीत व पारंपरिक पद्धतीने पळसाच्या फुलांपासून तयार करण्यात आलेल्या रंगाने एकमेकांना ओले करीत धुलिवंदन मोठ्या उत्साहात साजरा करण्यात आले. यावेळी शहरात रस्त्याने रंगाचा सडा पडल्याने शहर मनमोहक दिसत होते.
